Hevseroka Giştî ya KESK'ê Koçak: Divê her kes rola xwe bilîze 

2025-01-11 09:33:13


	STENBOL - Hevseroka Giştî ya KESK'ê Ayfer Koçakê diyar kir ku divê êdî pêvajo nebe pêvajoyeke ku ji aliyê DEM Partî û desthilatê ve tê meşandin û got: "Divê hemû saziyên sivîl bi taybet partiyên muxalefetê piştgiriyê bidin pêvajoyê."

	Rêberê PKK'ê Abdullah Ocalan ku li Girtîgeha Girtî ya Tîpa F a Ewlekariya Bilind a Îmraliyê di bin tecrîdê de ye, di 28'ê Kanûnê de bi heyeta Partiya Wekhevî û Demokrasiyê ya Gelan (DEM Partî) re hevdîtin pêk anî. Di peyamên Abdullah Ocalan de, wekî navnîşana çareseriyê îşaet bi Meclisê hat kirin û hat xwestin ku her kes rola xwe bilîze. 

	 

	Hevseroka Konfederasyona Sendîkayên Kedkarên Cemaweriyê (KESK) Ayfer Koçakê bal kişand ser girîngiya peyama Abdullah Ocalan û diyar kir ku divê her kes ji bo çareseriyê bi berpirsyarî rabe.

	 

	Ayfer Koçakê bal kişand ser hevdîtina şandeya DEM Partiyê ya bi Abdullah Ocalan re û gengeşeyên didomin û got ku hevdîtin bi şer û aloziya ku li Rojhilata Navînê diqewime ve girêdayî ye. Ayfer Koçakê got: “Hevdîtina ku pêk hat, ne derî pêvajoya nû ya li Rojhilata Navînê ye. Pirsgirêkên Sûriye, Xeze, Îsraîl û Rojavayê yek in. Di vê çarçoveyê de atmosfera şer a li gelek nuqteyan bi xwe re fikarên cidî tîne. Pêvajoya li Rojhilata Navînê diqewime ji aliyekî ve ji bo me hemûyan fikarên cidî û li aliyê din jî hêviyê bi xwe re tîne. Di rewşa heyî de gelên li herêmê dijîn zirareke mezin dîtine. Şer zirareke mezin dide hemû beşên civakê. Di vî warî de hêvî û daxwaza me ew e ku serdema bê ji bo gelan bibe formeke wiha ku hêviyê bi xwe re bîne." 

	 

	Ayfer Koçakê pêvajoya diyalogê ya di navbera 2013-2015'an de bi bîr xist û diyar kir ku "pêvajoya çareseriyê" ya wê demê ji aliyê desthilatê ve hatiye astengkirin. Ayfer Koçakê got: "Di salên bi navê pêvajoya çareseriyê de mirov dikaribû piçekî nefesê bigirta. Lê çi dibe bila bibe, pêvajo ji aliyê desthilatê ve hat qutkirin û bi dawî bû. Wê demê gelek koman berpirsyarî girtin ser xwe. Li gorî nêrîna me ger bi qasî serê derziyê jî ji bo aştiyê ronahî hebe, em wê tercîh dikin." 

	 

	Ayfer Koçakê da zanîn ku şer herî zêde gelê feqîr û kedkar dike hedef û got: “Ji ber ku qezenceke ku şervanan afirandiye heye. Kesên ku herî zêde ji şer mexdûr bûne bê şik feqîr in ku debara xwe bi keda xwe dikin. Êdî baweriya gel bi siyaseta 'yek welat, yek netewe, yek al' nemaye. Zarokên belengaz ên vî gelî têra xwe bedel dane. Niha gel dadikevin kolanan ji bo bi awayekî mirovî bijîn. Di vî warî de di van şeran de ciwan jiyana xwe ji dest didin. Di serî de daxwaza me aştî ye."

	 

	Ayfer Koçakê diyar kir ku hevdîtinên DEM Partiyê yên bi partiyên muxalefetê re girîng in û got: “Divê hemû saziyên sivîl bi taybet partiyên muxalefetê piştgiriyê bidin pêvajoyê. Meseleya rast wê piştî van hevdîtinan dest pê bike. Di vê wateyê de divê partiyên muxalefetê jî erkên xwe bi cih bînin. Bi gotineke din, divê êdî mesele nebe pêvajoyeke ku tenê ji aliyê DEM Partî û partiya desthilatdarê ve tê meşandin. Wekî pêvajoyeke bi gelek pêkhateyan, divê her kes berpirsiyariyê bigire ser xwe. Divê rêxistinên kedê û partiyên siyasî di vê pêvajoyê de hilberînê bikin. Ji bo vî karî divê hemû beşên civakê yên li vî welatî dijîn hevkariyê bikin. Divê her kes erka xwe pêk bîne."

	 

	MA / Ferhat Sezgîn