
Tirkiyeyê di 40 rojan de li Tişrînê 2 jê rojnameger bi giştî 11 sivîl qetil kir 

2025-01-17 12:50:10


	RIHA - Di êrişên dewleta tirk û koma wê ya paramîlîter SMO’yê yên ji 8’ê Kanûnê heta niha li dijî Bendava Tişrînê de 2 jê rojnameger bi giştî 11 sivîl hatin qetilkirin û 61 sivîl jî birîndar bûn.&nbsp;

	Dewleta tirk û koma wê ya paramîlîter SMO ji 8’ê Kanûna 2024’an heta niha êrişî Bendava Tişrînê dikin. Di van êrişan de rojnameger, tenduristvan û parastvanên mafan jî di nav de 11 sivîl hatin qetilkirin û 61 kes jî birîndar bûn. Êrişên dewleta tirk û koma paramîlîter ên li ser Bendava Tişrînê û Pira Qereqozaqê her ku diçe zêdetir dibin.&nbsp;

	&nbsp;

	Xelkê herêmê pêdiviya xwe ya enerjî û avê ji Bendava Tişrînê dabîn dike û bendaveke stratejîk e. Dewleta tirk û koma wê ya paramîlîter jî ev 40 roj in bênavber ji bo bidestxistina bendavê êriş dikin. Hêzên Sûriyeya Demokratîk (HSD) jî berxwedaneke mezin raber dike. Dewleta tirk û SMO ku bi tu awayî encamê bi dest naxin, sivîlan dikin hedef. Di roja 3’yemîn a êrişan de sivîl hedef hatin girtin.&nbsp;

	&nbsp;

	AMBULANSA BIRÎNDAR VEDIGUHEST HEDEF GIRTIN&nbsp;

	&nbsp;

	Êrişa ewil a li dijî sivîlan, li ser rêya di navbera Sirîn û Tişrînê de li dijî ambulanseke ku şervanên birîndar ji bendavê vediguhest Kobanê hate kirin. Di êrişa li dijî ambulansa Heyva Sor de 2 birîndar û ajokarê ambulansê hatin qetilkirin û hemşîreyek û birîndarê din jî bi giranî birîndar bûn.&nbsp;

	&nbsp;

	ROJNAMEGER HATIN QETILKIRIN

	&nbsp;

	Dewleta tirk di 19’ê Kanûnê de jî rojnameger Nazim Daştan û Cîhan Bîlgîn ên êrişên ser bendavê dişopandin bi SÎHA’yan hedef girt. Dema rojnameger ji Tişrînê diçûn Qereqozaqê, bi SÎHA’yan hedef hatin girtin. Di êrişê de her du rojnameger hatin qetilkirin û ajokarê wesayîtê Ezîz Hec Bozan jî birîndar bû.&nbsp;

	&nbsp;

	KONVOYA SIVÎLAN HEDEF HATE GIRTIN

	&nbsp;

	Welatiyên Tebqa, Reqa, Hesekê û Kantona Cizîrê ji bo protestokirina hedefgirtina bendavê û piştevaniya bi HSD’ê re, di 8’ê Çileyê de ber bi bendavê ve bi rê ketin. Dewleta tirk dema konvoy di rê de hedef girt. Di êrişê de Ozan Hemo, Kerem Ehmed El Şihab El Hemed (Ji rêveberên Kombûna Jinan a Zenûbiyayê), Azad Ferhan Mihemed Hesan (Endamê Tevgera Ciwanên Şoreşger a Sûriyeyê) hatin qetilkirin. Diyar Mihemed Hecî, Mihemed Mistefa Heqil, Hisên Salim Silêman, Mistefa Mehmûd Yûsîf, Arif Elî Ehmed, Mihemed Enter Beko, Delîl Ebdela Mihemed, Aldar Ebd, Elezîz Îbrahîm, Necîb Berkel, Mesûd Fetah Eqîl, Mihemed Osman Daban, Hesen Şahîn, Feyha Elî, Îbrahîm Xelîl Salıh û Mehmûd ê paşnavê wî nehat zanîn û kesa bi navê Şeyda jî birîndar bûn.&nbsp;

	&nbsp;

	SIVÎLÊN NOBET DIGIRTIN HATIN QETILKIRIN

	&nbsp;

	Dewleta tirk di 15’ê Çileyê de careke din êrişî sivîlan kir. Êriş li dijî çalakvanên nobetê hate kirin. Di êrişê de Omer Hisên Derwêş, Osman Mûstefa Îbrahîm û Basim Omer hatin qetilkirin. Îlham Xelîl Derwêş (36), Dîlan Murad Xelîl (21), Edle Mûstefa Mihemed Elî (24), Azad Idrîs, Yasir Hemîd, Mazlûm Hemo (30), Meryem Henan (70), Mahir Mehyedîn, Kurdo Mehmûd Hesen, Fatme Omer Elî, Izedîn Hecî Ebas, Osman Îbrahîm, Hîbe Omer Ezîz, Ronîze û Mihemed Ebdulqadir û 4 welatiyên navên wan nehat zanîn birîndar bûn.&nbsp;

	&nbsp;

	Di êrişa dewleta tirk a di 16’ê Çileyê de jî sivîlekê navê wî nehat zelalkirin hat qetilkirin û 21 welatî jî birîndas bûn.&nbsp;

	&nbsp;

	Bi êrişa dawî re, ji 8’ê Çileyê roja nobet hatiye destpêkirin heta niha konvoya sivîlan 7 caran hedef hate girtin.&nbsp;