Nûçegihanê Ajansa Nûçeyan a Dîcleyê (DÎHA) yê berê yê Erziromê Mehmet Arslan ku salên dirêj xebat meşand, di qezaya trafîkê de jiyana xwe ji dest da. Hat zanîn ku duh bi şev di têketina navçeya Qereyaziyê de du wesayît li hev qelibîn û Arslan bi giranî birîndar bû. Arslan, di kamyoneta tê de asê mabû piştî bi saetan hate derxistin. Arslan ê bi ambulansê dibirin Erziromê, di rê de jiyana xwe ji dest da. Cenazeyê Arslan, dê îro li goristana navenda Qereyaziyê bê definkirin. 

 

Arslan ku demekê di partiyên siyasî yên Kurd û saziyên ziman de xebitî, ji sala 2013’an dest bi DÎHA’yê kir û heta ajans hatî girtin jî xebata xwe domand. 

 

Arslan ku gelek caran hate binçavkirin, di sala 2016’an de bi îdiaya “di lêpirsîna bi nepenî dihat domandin de wêne kişandiye û bi raya giştî re parve kiriye” hate girtin. Arslan, demekî kin piştre hate berdan, gelek caran gef lê hatin xwarin û doz lê hatin vekirin.