Piştî êrişên li ser dibistanan ên li Sêweregê û Mereşê Sendîkaya Kedkarên Perwerdehî û Zanistê (Egîtîm Sen) lê pêşberî Wezareta Perwerdeyê ji bo 3 rojan “nobeda jiyanê” da destpêkirin. Gelek partiyên siyasî û sendîka piştgirî dan nobedê û anîn ziman ku êriş encama polîtîkayên desthilatê ne.  

 

Endama Lijneya Rêveberiya Navendî (MYK) a Egîtîm Senê Evrîm Gulezê got: “Ev demek e dirêk e li dibistanan tundî didome. Ji bo Wezareta Perwerdeyê li dijî tundiya li dibistanan tevdîran bigire û mafê perwerdeya bi ewle ya xwendekaran û mamosteyan biparêze em li vir di nobedê de ne. Em ji bo çareseriyê bangî Wezareta Perwerdeyê dikin.” 

 

‘NE BÛYEREKÎ TAKEKESÎ YE’

 

Sekreterê Giştî yê Egîtîm Senê Zulkuf Guneş, destnîşan kir ku êrişên li Sêwereg û Mereşê ne bûyerên takekesî ne û got: “Wezaret, brokrat, medya û siyasetmedar her tim zimanê tundiyê bikar tînin û ev yek di nava civakê de dibe sedema cudakariyê. Ev êriş ne bûyerên takekesî ne. Em wek Egîtîm Sen li dijî vê û ji bo li dijî êrişan tevdît bên girtin têdikoşin.”

 

‘AŞTÎ PÊK BÊ PERWERDE DÊ DEMOKRATÎK BIBE’

 

Sekretera Jin a Navenda Egîtîm Senê Sîmge Yardin, diyar kir ku civak bi krîzek re rû bi rû ye û wiha axivî. “Desthilata AKP’ê hewl dide îdeolojiya xwe ava bike. Dema vê yekê dike mafên zarokan û pêşerojê nabîne. Di pergala yekdestî, zayendperest, neteweperest û nîjadeperest de bi israr e. Nasnameyên cuda nayên dîtin û perwerdeya bi zimanê dayikê tune tê hesibandin. Em encamên vê bi hev re dibînin. Ger aştî pêk bê perwerde dê demokratîk bibe, zimanê tundiyê dê ji holê rabe û qetlîamên jinan kêm bibe. Ji bo polîtîkayên perwerde û aştiyê pêdivî bi têkoşîneke xurt heye.”