ÊLIH - Endamên Meclisa Şaredariya Êlihê yên DEM Partiyî ku qeyûm nehişt bikevin şaredariyê, bi sedemên “Peywira xwe xerab bi kar aniye” û “Astengkirina bikaranîna mafên siyasî” derheqê qeyûm de serlêdana sûc kirin.
Piştî li Şaredariya Êlihê qeyûm hat tayînkirin, li ser fermana qeyûm Ekrem Canalp, destûr nehat dayin endamên meclisa şaredariyê yên DEM Partiyî bikevin şaredariyê. Endamên meclisê jî bi sedemên “Peywira xwe xerab bi kar aniye” û “Astengkirina bikaranîna mafên siyasî” derheqê qeyûm de serlêdana sûc kirin. Koma DEM Partiyê ku ji 35 endaman pêk tê, derheqê qeyûm de li Serdozgeriya Komarê ya Êlihê serlêdan kirin.
Parêzer Yûnûs Bagiş li ser navê endamên meclisê serlêdan kir. Di serlêdanê de hate gotin ku bêyî hincetek were nîşandan mewzûatên heyî hatine binpêkirin û daxwaza beşdarbûna civîna mehane ya hevşaredar û endamên meclisê ji hêla hêzên ewlekariyê ve hatiye astengkirin. Hat diyarkirin ku polîsan van fermanan ji qeyûm digirin. Hat gotin ku Xala 45’emîn a Qanûna Şaredariyan a bi hejmar 5393 ku dibêje “Heke cihê şaredar bi awayekî vala bimîne, walî dê di nava 10 rojan de meclisa şaredariyê bicivîne” bêyî sedemek were nîşandan hatiye binpêkirin.
BINPÊKIRINA DEMOKRASIYÊ
Di serlêdanê de her wiha bêhiqûqtiya biryara qeyûm hate destnîşankirin û xwe bi xwe birêvebirina rêveberiyên herêmî hêmayeke sereke ya dewletên demokratîk e. Bi domdarî wiha hate gotin: “Bi tayînkirina qeyûm re ev xweserbûn hatiye bisînorkirin û rêveberiyên herêmî ketine bin kontrola îdareya navendî. Dema hewce kir ku şaredar ji peywirê bên dûrxistin, divê v li gorî hiqûqê were kirin û meclisa şaredariyê bi xwe şaredarê nû hilbijêre. Ev yek, hewcehiyeke feraseta rêveberiya demokratîk e. Lê belê bi sepana qeyûm re ev yek hatiye binpêkirin.”
ÊRIŞA LI DIJÎ MAFÊ BIJARTIN Û HILBIJARTINÊ
Di serlêdanê de hate bibîrxistin ku DEM Partî li şaredariyê xwedî 35 kursiyan bû û wiha hate gotin: “Endamên meclisa şaredariyê bi hilbijartinê hatine diyarkirin û ji ber peywirên xwe yên li meclisa şaredariyê tên darizandin û ji peywirê tên dûrxistin. Di rewşeke wiha de ku dema hêj li ser peywira xwe û derheqê wan de tu kirariyên lêpirsîn û teqîbatê nehatin destpêkirin de, di 04-05-06-07-08/11/2024’ê de negirtina civîna meclisa şaredariyê ya mehane. Bi vê yekê re jî îradeya hilbijêran hatiye astengkirin û mafê bijartin û hilbijartinê hatiye binpêkirin. Em dixwazin ku piştî vê giliyê, derheqê kesên rê li ber van binpêkirina vekirin de lêpirsîn were destpêkirin, îdianame were amadekirin û teqîbat were destpêkirin. Bi vê yekê re jî em dixwazin rewşa derqanûnî ji holê were rakirin.”
MA / Fethî Balaman