Êrişên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê didomin. Li dijî êrişan, di 8’ê Kanûnê de bi beşdariya gelê herêmê li Bendava Tişrînê çalakiya nobetê hat destpêkirin. Di encama êrişa dewleta tirk a bi SÎHA’yan a di 18’ê Çileyê de şanogerê Kurd Bavê Teyar (Cuma Xelîl Îbrahîm) bi giranî birîndar bû û rojek piştre jiyana xwe ji dest da. Keça Bavê Teyar, Leyla Cuma Îbrahîm (Amara) ku li Girtîgeha Jinan a Erzînganê tê ragirtin, bi rêya parêzerê xwe ji bo merasîma definkirina bavê xwe peyamek parve kir. 

 

'EM TÊKOŞÎNA GELÊ ROJAVA SILAV DIKIN’ 

 

Li gorî nûçeya JINNEWS’ê, di merasîma definkirina cenazeyan a li Qamişloyê de ev peyam hate parvekirin: 

 

“Di serî de serê Serokatî û gelê Kurdistanê yê bi rûmet sax be. Ew ji bo Kurdistan û hemû gelên bindest her dem xwedî nirxek têkoşer bû. Têkoşîna ku wî heta niha dida, me dît ku gelê Kurdistanê îro xwedî li wê têkoşînê derdikeve û bersiva xwe bi têkoşînê dide. 

 

Berî ku şehîd bikeve, di gotinên xwe yî dawiyê de wiha got ‘Em dev ji têkoşînê bernadin, em natirsin û em li vir in.’ Îro gelên welatparêz ku rabûne ser lingan xwedî li wî û hevrê yên wî derdikevin. Ew meşale ya têkoşînê berî niha bi salan hat vêxistin û em ê jî heta dawiyê bibin şopdarê vê meşale yê. 

 

Bavê min ê ku PKK'ê û Serokatî bi min da naskirin û hezkirin her dem bû rêhevalê min. Ew bû wesîleya ku ez îro wî hîn zêdetir hîs bikim. Em wek girtiyên jin ên Girtigeha Erzînganê, ji malbata wî û ji malbata hevalên li cem wî şehîd ketine sersaxiyê dixwazin. Ji 7 heta 70 salî serê gelê Kurd ê bi rûmet sax be. Em berxwedana gelê Rojava silav dikin û ji wan re jî sersaxiyê dixwazin. 

 

Em jî dev ji têkoşînê bernadin, natirsin û em li vir in. 

 

Şehîd namirin...

 

Girtîyên PKK û PAJK'ê yên Girtîgeha Erzîngan ê

 

Silav û rêzên şoreşgerî.”