Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari li Meclisê di civîna koma partiya xwe de mijarên di rojevê de nirxand. Tulay Hatîmogûllari, diyar kir ku bi tevlibûneke gelek xurt yek ji Newrozên herî girîng û dîrokî hatiye lidarxistin û got: “Me Newrozeke ku hêviya aştî û demokrasiyê aj dayî pîroz kir. Li rexa din jî me di serdemeke zext zêdebûyîn û îradeya gel nehatiye naskirin de pîroz kir. Bi milyonan kesan li qadên Newrozê gotin; aştî, demokrasî û edalet. Gel, xwedî li aştiyê derketin. Ciwan bûn dengê jiyaneke demokratîk û misoger. Jinan, bi rengên xwe qadên Newrozê xemilandin. Dema em li Newroza Amedê, Leyla Zana ya hêja got; ‘Di salên 90’î de bi zor û zehmet 80 kes ji bo pîrozbahiya Newrozê kom dikirin lê niha em gihiştin milyonan. Weke gelê Kurd em bi ser ketin.’” 

 

Tulay Hatîmogûllari, diyar kir ku bi milyonan kesan peyameke hevpar dane û wiha domand: “Peyama hevpar a milyonan kesan ev bû; em piştgiriyê didin aştî û çareseriyê. Milyonan kesan got; em piştgiriyê didin banga dîrokî. Gotin; ‘Daxwaza me ya herî mezin ew e ku birêz Ocalan azad bibe û şert û mercên xebateke azad bên avakirin.’ Xwestin şert û mercên birêz Ocalan tavilê bê sererastkirin. Divê îktîdar vî dengê milyonan bibihîse û guh bide daxwazên wan. Divê îktîdar peyamê baş fêm bike. Kesek nikare daxwaza aştiyê paşguh bike û serî li siyaseta mijûlkirinê bide. Yên guhên xwe li daxwaza aştiyê ya milyonan digirin, dê pir mezin winda bikin.” 

 

BANG LI ÎKTÎDARÊ KIR

 

Tulay Hatîmogûllari, diyar kir ku kesên pirsûleya wan ne aştî, demokrasî, edalet û azadî be nikarin aştiya civakî pêk bînin û wiha pê de çû: “Çareseriyên palyatîf, helwestên mijûlkirinê û hwd. mezintirîn xerabiya li hêviya aştiyê ye. Hinek mijar hene ku divê tavilê gav bên avêtin. Ji bo rêxistina birêz Ocalan bikare kongreyê bicivîne divê demildest zemîna ewlehiyê bê avakirin. Ev jî bi diyaloga bi birêz Ocalan re dibe. Bi avakirina şert û mercên xebata azad a birêz Ocalan dibe. Birêz Erdogan digot ‘qonaxa krîtîk hate derbaskirin.’ Belê rast e hate derbaskirin lê divê îktîdar û dewlet qonaxa duyemîn a krîtîk derbas bike. Ji bo civakîkirina vê pêvajoyê berpirsyartî ya îktîdar û dewletê ye. Em li çaverêya vê ne. Ev qonax bi bidawîkirina sepanên dijdemokratîk, xurtkirina zemîna demokratîk dikare bê derbaskirin. Mezintirîn bendewariya civakê jî ev qonaxe ye. 

 

EV BANG JI BO 85 MILYON KESA YE 

 

Divê îktîdar û dewlet ji çareseriyê netirse. Divê gavên zemîna wê amade dikin tavilê biavêje. Banga birêz Ocalan, banga pêşerojeke demokratîk, hiqûqî û adilane ye. Ev bang, ji bo tevahiya 85 milyon welatiyan e.” 

 

‘EM LI DIJÎ DERBEYA SIYASÎ NE’

 

Tulay Hatîmogûllari, bal kişand ser girtina Şaredarê Bajarê Mezin ê Stenbolê Ekrem Îmamoglû û kesên pê re, girtina ji peywirê ya rêveberiya Baroya Stenbolê, binçavkirina xwendekar û rojnamegeran û got: “Îktîdar ne li hiqûqê digere ne jî li rewabûnê. Bi çoyê darazê êrişî her cihî dike. Tundiyeke mezin tê kirin. Em tundî û îşkenceya polîsan qebûl nakin... Em li vir bangî îktîdarê dikin; ev çi tirs e, ev çi deraqiltî ye? Tirkiye bi neheqî û derhiqûqiyeke mezin re rû bi rû ye. Tevahiya Tirkiyeyê li ser pêya ye. Ma hûn ê tevekan bigirin? Hûn ê welat wiha bi rêve bibin?  Tavilê van êriş û tundiyê bidin sekinandin. Der heqê polîsên tundî kirine de jî lêpirsîna bidin destpêkirin. Em, derbeya siyasî ya li dijî Îmamoglû û Baroya Stenbolê qebûl nakin. Hezar silav li ciwan û gelên me yên li qadên Newrozan, li Saraçhaneyê li ber xwe didin. Berxwedana ji bo demokrasiyê maf e.” 

 

BERTEK NÎŞANÎ HEQARETAN DA 

 

Tulay Hatîmogûllari, di berdewamê de bertek nîşanî hedefgirtina hevjîna Ekrem Îmamoglû, Dîlek Îmamoglû da û got ew heqaretên li dijî jinan qebûl nakin. 

 

LIHEVKIRINA BAJAR 

 

Tulay Hatîmogûllari, bi domdarî got: “Hewl didin Lihevkirina Bajar weke sûc nîşan bidin. Lihevkirina Bajar ne tenê ji bo Stenbolê, ji bo her devera welat ket meriyetê. Lihevkirina bajar, temînata jiyana gel û baweriyan e. Gotina ‘Lihevkirina Bajar sûc e’, dijminatiya li Kurdan e. Tê wateya ku dibêjin Kurd nikarin li Stenbol, Enqere û Îzmîrê bên temsîlkirin. Em vê qebûl nakin.” 

 

PIŞTGIRÎ DA BARIŞ AZAD

 

Tulay Hatîmogûllari, her wiha bertek nîşanî lînca li dijî Azad Bariş da û got: “Der heqê Bariş Azad de senaryoyên derew çêdikin û hewl didin civakê bixapînin. Em vê bi tu awayî qebûl nakin. Ev kesên wiha dikin, hewl didin pêvajoya diyalog û muzakereyan sabote bikin.

 

‘HEWL DIDIN MUXALEFETÊ LI DERVEYÎ PÊVAJOYA AŞTIYÊ BIHÊLIN’ 

 

Tulay Hatîmogûllari, bi bîr xist ku muxalefetê piştgiriyeke mezin daye nîqaşên têkildarî aştî û çareseriyê û axaftina xwe wiha qedand: “Vê rewşê hêvî da me. Lê îktîdar heke bi êrişan hewl bide muxalefetê li derveyî vê pêvajoyê bihêle, ev karekî xetere ye. Lîstikeke pir xetere tê lîstin. Em ê li dijî vê rewşê û bêhiqûqiyan bêdeng nemînin. Divê muxalefet li derveyî pêvajoyê neyê hiştin. Berevajî vê, divê tevahiya muxalefetê tê de cih bigire û pêvajoyeke mutebeqeta civakî birêve bibin. Divê em bi hev re li dijî bêhiqûqtî û neheqiyê bisekinin. Nabe ku çareseriya pirsgirêka Kurd û demokratîkkirina Tirkiyeyê bo însafa îktîdarê were hiştin.  Îradeya hemû derdoran raber kiriye, deriyeke mezin ê firsendan vekir. Divê em vê pûç nekin. Em di pêvajoyeke kaotîk û tevlihev de ne lê divê bêhêvî nebin. Kî çi bike û çi bibêje bila bibêje dê têkoşîna me bi ser keve.”