WAN - Rêveberên Komeleya DADSAZ'ê ya ku li Wanê ji bo pêşxistina wêjeya hiqûqî ya kurdî û belavkirina xebatên xwe yên di warê hiqûqê de li Wanê hatiye avakirin, destnîşan kirin ku ji bo Kurdî di warê hiqûqê de pêş bikeve tevkariyê bikin.
Komeleya Vekolîn û Perwerdeya Hiqûqê (DADSAZ) bi armanca pêşxistina lîteratura hiqûqê ya kurdî û di warê hiqûqê de belavkirina xebatên Kurdî, li Wanê hat avakirin. Ji bo komeleya ku di 21'ê Sibatê Roja Zimanê Zikmakî ya Cîhanê de bi awayekî fermî damezrandina xwe îlan kir, di 1'ê Nîsanê de serî li Midûriyeta Komeleyan a Bajar a girêdayî Walîtiya Wanê dabû. Komele dema ku midûriyetê serlêdana 8’ê Nîsanê qebûl kir bi awayekî fermî hat avakirin.
Hemû xebatên komeleyê dê bi zaravayên Kurdî be. Metnên hiqûqî, dê ji bo qanan bên komkirin û bi van belge û dokuman bên çêkirin. Di nav damezrînerên komeleyê de kesên ku ev 2 sal in di bin serokatiya Baroya Wanê de perwerdehiya hiqûqa Kurdî dibînin hene. Komele ji aliyê 10 kesan ve hatiye avakirin û di lijneya rêveberiyê de 7 kes hene.
Parêzer û nivîskar Sabîr Ebdulahîzad ku yek ji damezrînerên komeleyê ye got: "Armancên bingehîn ên komeleyê pêşxistin û lêkolîna lîteratura hiqûqê ya Kurdî ye. Tu qanûn bêyî ziman pêş nakeve. Ziman bingeha hiqûqê ye. Di vî warî de hiqûqa bi Kurdî pir girîng e. Em dixwazin rave bikin û nîşan bidin ku hemû lêkolînên hiqûqî dikarin bi Kurdî bên kirin. Ji bo pêşxistina vê lîteratura kurdî divê em ji bo hemû rêbazên hiqûqî yên navneteweyî jî bixebitin. Em dixwazin hemû qanûnên medenî û siyasî wergerînin. Ger em van bikin, dê Kurdî di warê hiqûqê de pir pêş bikeve. Em ê hiqûqa gelek welatan vekolin."
Ebdulahîzad da zanîn ku heta du sal berê jî gelek lêkolîn li ser vê mijarê hatin kirin û baroyên herêmê piştgirî dane û got: "Di van salan de dîsa di ferhenga hiqûqê ya Kurdî de gaveke girîng hat avêtin. Em ê li ser çawanî û ronîkirina van lêkolînan li qadan gengeşeyan bikin. Ne karê saziyek tenê ye ku vê yekê pêk bîne. Pêwîstiya me bi alîkariya hemû sazî û parêzeran heye. Em dixwazin di demeke nêz de panelên perwerdehiyê yên li ser înternetê bidin destpêkirin. Di vî warî de me plansaziyek çêkir, lê armanca me ya herî girîng ew e ku komele bibe navendek ji bo lîteratura hiqûqê. Kurdî di her warî de ji bo vê têra xwe dike."
Ji damezrînerên komeleyê parêzer Alî Şapkacî jî anî ziman ku wan perwerdeya hiqûqê ya bi Kurdî dîtiye û wiha got: "Armanca avakirina komeleyê pêşxistina lîteratura hiqûqa Kurdî ye. Dema ku hûn têkiliya gelê Kurd bi hiqûq û dadgehan re saz bikin, diyar dibe ku ev pêwîstî çiqasî girîng e. Pêdiviya Kurdan bi lêkolînên wiha heye. Yek ji armancên xebata me jî ew e ku em hewzeyekê ava bikin ku lêkolîner dema bixwaze gotarek li ser hiqûqê binivîsîne, bi kar bîne. Eger wisa be hem gel dê bi hêsanî pirsgirêkên xwe ji parêzer re vebêjin û hem jî parêzer dê wan fêm bike.”