Rêberê Gelê Kurd Abdullah Ocalan duh di çarçoveya "Pêvajoya Aştî û Civaka Demokratîk" de bangeke din a dîrokî kir. Di banga bidîmen de Girtiyên li Girtîgeha Girtî ya Ewlehiya Bilind a Tîpa F ya Îmraliyê jî li cem Abdullah Ocalan cih girtin. Dayikên Aştiyê yên Hezexê ku zarokên xwe di dema şer de winda kirine, piştî 26 salan banga bidîmen a Abdullah Ocalan temaşe kirin û dengê wî bihîstin. Dayikan hestên xwe yên di dema temaşekirina dîmen de û daxwazên xwe anîn ziman. 

 

SAETEKÊ LI BENDA DÎMEN MAYE  

 

Dayika Aştiyê Halîme Ete (50) ku kurê xwe Rezan Ete di êrişên DAIŞ'ê yên li ser Kobanî de winda kiriye, diyar kir ku piştî wergirtina agahdariya ku dîmen dê werin parvekirin, ew saetekê li ber televîzyonê maye sekinî û got: "Dema ku min nûçe bihîst ez pir kêfxweş bûm û ez li ber televîzyonê mam sekinî. Dema ku dîmen hatin nîşandan ez pir kêfxweş bûm. Dîmenan moral da min. Em ji Rêberê xwe bawer dikin. Em heta dawiyê pê bawer in. Heta ku em sax bin em ê li cem wî bin. Hêviyên me yên mezin hene."

 

Halîme Eteyê ku got gelê kurd ji ber dîmen kêfxweş bûye, diyar kir ku wekî dayik, ew amade ne ku di pêvajoyê de rola xwe bilîzin. Eteyê diyar kir ku ew ê paşve gav neavêjin û got: "Em heta dawiyê li ser soza Rêbertiyê ne." Eteyê bang li hemû dayikan kir ku piştgiriyê bidin pêvajoyê.

 

‘BILA AŞTIYEKE BIRÛMET ÇÊBE' 

 

Dayika Aştiyê Ferîde Margaz (62) ku kurê xwe Kamîl Margaz 8 sal berê di şer de winda kiriye, got ku dema wê dîmen dîtiye wê di heman demê de gelek hest hîs kiriye û got: "Ez hem kêfxweş bûm hem jî xemgîn bûm."

 

Ferîde Margazê diyar kir ku wê kurê xwe di şer de winda kiriye û naxwaze dayikên din jî vê êşê bikişînin û got: "Bila aştiyeke birûmet çêbibe. Ji bo vê yekê, divê Rêberê me li cem me be. Ev dîmenê ku di vê pêvajoyê de hat weşandin, hêviya me mezin kir." 

 

‘JI KELECANÊ EZ GIRIYAM' 

 

Nebîha Akay (64) ku di şer de du birayên xwe, Celal û Mehmet Ata Acar, winda kirine, diyar kir ku bihîstina dengê Rêberê Gelê Kurd Abdullah Ocalan û bi dîmen dîtina wî ya piştî 26 salan ew kelecanî kiriye û got: "Piştî vê heyecanê ez giriyam. Îro, piştî demeke dirêj min ev hest hîs kir. Em dixwazin Rêberê xwe di demek nêzîk de li ser sûrên Amedê bibînin. Ew 26 sal in di tecrîdê de ye, li nava çar dîwaran. Ne malbata wî û ne jî parêzerên wî ew nedîtibûn. Mirovekî normal nikare 26 rojan li ber xwe bide, lê Rêber bi ramanên xwe 26 salan ciwan ma." Nebîha Akayê anî ziman ku Abdullah Ocalan ji bo jin û ciwanan xebat kiriye û ew wekî dayik ji ber van xebatan kêfxweş in û wiha domand: "Aştî û azadî ji bo her kesî pêwîst e. Ferq nake ew kurd, tirk, leşker, dayika gerîla bin, divê her kes aştiyê bixwaze. Xwezî ew 20 sal berê rûnîştibûna û biaxiviyana. Wê demê hesta ku îro li me peyda bû, peyda bûbûna. Em ê li ser sûrên Amedê bi Rêberê xwe re mil bidin milê hev. Ev roj nêzîk in."

 

‘KURDAN BI HEMÛ CÎHANÊ DA NASÎN' 

 

Dayika Aştiyê Kumrî Babat ku bi salan e di nava Dayikên Aştiyê de ye got: "Em ji banga Rêber pir kêfxweş bûn. Wekî Dayikên Aştiyê, em naxwazin zarokên kesî bimirin. Em aştî û wekheviyê dixwazin. Ev banga Rêber ne tenê ji bo kurdan, dê ji bo her kesî aştiyê bîne. Ev bang dê şeran bi dawî bike. Rêber gelek gav avêtiye, lê dewletê neavêtiye. Divê dewlet gavekê ber bi aştiyê ve bavêje. Em bi salan e di şer de ne. Ciwan dimirin, zindan tijî ciwanan in. Dora dewletê ye ku gavek ber bi aştiyê ve bavêje. Piştî 26 salan, me Rêberê xwe dît û ev yek me kêfxweş kir. Divê jin û ciwan xwedî li vê pêvajoyê derkevin. Rêber kurdan bi tevahiya cîhanê da nasîn. Ger îro kurd li çar aliyê cîhanê tên nasîn, ev bi saya Rêber e. Divê her çar beşên Kurdistanê xwedî li vê bangê derkevin." 

 

MA / Emrûllah Acar