Welatiyê bi navê Seyîthan Durdu (40), di 28’ê Kanûna 2024’an de li gundê Avzêrkê yê navçeya Seravê ya Wanê di encama gulebarana leşkeran de jiyana xwe ji dest da. Biryara nepeniyê ya li ser dosyaya lêpirsîna ya Durdu didome. Serpel Y.A. di çarçoveya lêpirsînê de hate binçavkirin û di 1’ê Çileyê de bi sûcê “Kuştina biqesdî” hate girtin. Lê belê piştî îtîraza hatiye kirin, hefteyek şûnde hate berdan. Parêzerê Durdu dê îro li dijî biryarê îtîrazê bike. 

 

Me xwe gihand îfadeyên li qereqolê yên du serpel û leşkerekî pispor ên di çarçoveya lêpirsînê de hatin binçavkirin. Li gorî agahiyên hatine bidestxistin, Durdu bi giranî birîndar bû û leşkeran ew di wê rewşê de hiştin û vegeriyan qereqolê. Piştî şahidên bûyerê demekî dirêj li 112’ê geriyan, Durdu rakirin nexweşxaneyê lê ji ber ji nava wî xwîn diçû jiyana xwe ji dest da. 

 

ÎDIAYA ‘MIN GULE LI HEWAYÎ REŞAND’

 

Sê leşkerên îdia dikirin ku bi wesayîteke sivîl penaber dişopandin, gotin ku serê sibehê saet di 03.40’ê de rastî komekî penaberan hatine û ew binçav kirine. Serpel Y.A. îdia kir ku wî du guleyên debanceyê berdaye hewayî û piştre çûye qereqolê û îstihret kiriye. Y.A. di berdewama îfadeya xwe de ev îdia kir: “Saet derdora 07.00’ê min bihîst ku kesek hatiye kuştin. Li gorî min, dibe ku komên cuda yên leşkeran ên penaberan dişopînin jî hebin. Ji ber ku car bi car di dema dewriyeyê de dengê çekan dihat. Ez kesê bi navê Seyîthan Durdu nas nakim. Di dema dewriyeyê de ez qet neçûm cihê lê hatiye kuştin.” 

 

‘BIRÎNDARE LÊ ALÎKARIYÊ NADINÊ’ 

 

 

Parêzerê malbata Durdu, Ozal Bedîr da zanîn ku di roja duyemîn a bûyerê de mudaxilî dosyayê bûne. Bedîr, diyar kir ku bi dozgeriyê re hevdîtin kirine û got ku biryara nepeniyê ya ji bo dosyayê didome. Bedîr, wiha domand: “Li gorî gotinên şahidan û agahiyên me bi dest xistin, hêzên ewlekariyê sînorê peywira xwe derbas dikin û bi wesayîteke sivîl dest bi şopandinê dikin. Li çolterê Taxa Girêdilê guleyan ber didin û Seyîthan Durdu jiyana xwe ji dest dide. Lê piştî birîndarkirinê ne agahiyê didin nexweşxaneyê ne jî cihekî din. Di roja ewil a lêpirsînê de şahid tên binçavkirin. Dema bûyer çendek roj piştre zelal dibe, du serpel û leşkerekî pispor tên binçavkirin û yek ji wan tê girtin. Bûyerekî girîng e, hêzên ewlekariyê yên li ser sînor her tim rayeya xwe derbas dikin û çekan bi kar tînin. Ne cendirme ne dozgerî ne jî nexweşxane ji tiştên bûyerê qewimîn nayên agahdarkirin. Ev pir girîng e. Gule pir ji nêz ve hatiye berdan. Seyîthan Durdu birîndar dibe lê alîkariyê nadin wî.” 

 

‘ŞAHIDAN DERXIST HOLÊ’

 

Bedîr, got ku lêpirsîn didome û dê berfirehtir bibe û wiha bi dawî kir: “Em dosyayê bi sûcên ‘kuştina bi qesdî’ û ‘binpêkirina peywirê’ dişopînin. Heke li cihê bûyerê şahid tunebûna, ji ber şert û mercên eraziyê, barîna berfê û ji ber ku bûyer bişev qewimî dê me cenazeyê Durdu di demsala biharê de piştî helîna befê bidîta. Ji ber ku li wir şahid hebûn bûyer derket holê. Li cihê bûyerê girtekên lêkolînê, şopên tekera wesayîta leşkerî, şopên xwînê û her tişt hatin tespîtkirin. Yanî dema mirov li cihê kes lê hatiye kuştin û cihê wesayît çûyê dinihêre, ji navberekî nêz ve gule lê hatine reşandin. Di vê rewşê de nepêkan e leşker Seyîthan Durdu nebînin. Heke biryara nepeniyê bê rakirin, jixwe ev rewş dê derkeve holê. Tu gumana me nîne ku ev kes hatiye şopandin, ji nêz ve gule lê hatine reşandin û li wir hatiye hiştin û çûne. Xebata dozger a têkildarî bûyerê didome. Em dixwazin hemû kitekitên bûyerê derkevin holê û lêpirsîneke adilane bê kirin.” 

 

MA / Adnan Bîlen - Ozlem Yacan