AMED - Serokê Herêma Federe ya Kurdistanê Nêçîrvan Barzanî ji bo Newroza Amedê peyam şand û got: “Ji bo aştiyê çi ji me were xwestin, em amade ne ku pêk bînin.”
Serokê Herêma Federe ya Kurdistanê Nêçîrvan Barzanî ji bo Newroza Amedê peyam şand. Barzanî, Newroza hemû Kurdistaniyan pîroz kir.
Peyama Nêçîrvan Barzanî wiha ye:
“Xuşk û birayên hêja, gelê xweştivî yê Amedê û beşdarên bi rûmet yên şahiya Newrozê; ji dil û can cejna we ya Newrozê û sersala we ya nû pîroz dikim. Newroz, ev cejna dîrokî ku nîşana vejîn, nûbûn, hêvî û umêdê ye, kultureke me ya hevpar e ku bi dirêjahiya hezaran salan, Kurdan û gelên vê herêmê bi hev re girê dide. Hêvîdar im Newroza îsal bibe Newroza xêr û xweşî û serkeftinê ji bo we hemûyan.
Cejna me ya Newrozê, îsal di demekê de vedigere ku zemîne û hêviyek ji bo aştiyê û aramiyê çê bûye. Ji bo vê yekê hewlên dewleta Tirkiyê, di serî de birêz serkomar Recep Tayyîp Erdogan û hemû hêz û aliyên ku keda wan ji bona aştiyê heye, herweha hewlên birêz Ocalan û her kesê ku piştgiriyê dide pêvajoya aştiyê, gelek bi rêz û pêzanîn dinirxînim.
Pêvajoya aştiyê derfet û gaveke dîrokî ye, divê neyê windakirin û her kes ji bo biserxistina aştiyê bi dil û can bixebite. Gelê Kurd bi aştiyê û pêşxistina çanda bihevrejiyanê, dikare baştir û bêtir dengê xwe bighîne û mafên xwe bidest bixe. Aştî dikare navbera gel û milletan xweş bike, welatan ava bike û ji her kesî re aramiyê bîne.
Em dîsa li Herêma Kurdistanê weke her tim piştgiriya xwe ji bo aştiyê û biserxistina vê pêvajoyê nîşan didin. Ji bo ku aştî bi ser keve, çi bikeve ser milê me û çi ji me bê xwestin, em amade ne. Serkeftina aştiyê, serkeftina me hemûyan e.
Di vê roj û cejna pîroz de, dîsa ji dil û can we hemûyan silav dikim, cejn û sersala we pîroz û bi xêr be. Hêvîdar im Newroza îsal bibe Newroza aştî û aramiyê. Hêviya cejn û şahiyek xweş û bi kêf, ji we hemûyan re dixwazim. Hûn her hebin.”