WAN - Hevşaredarê Bajarê Mezin ê Wanê Abdullah Zeydan têkildarî cezayê hefsê ji MA’yê re axivî û got: “Ev biryareke siyasî ye û tu hukmê wê nîne.”
Danişîna doza Hevşaredarê Bajarê Mezin ê Wanê Abdullah Zeydan îro li 5’emîn Dadgeha Cezayên Giran a Amedê hate lidarxistin. Dadgehê, bi îdiaya “Bi zanebûn û bi dilxwazî alîkarî daye rêxistinê” 3 sal û 6 meh cezayê hefsê da Zeydan. Abdullah Zeydan, têkildarî cezayê hatiye dayin ji Ajansa Mezopotamyayê (MA) re axivî.
Zeydan, wiha got: “Kesên ku di 31’ê Adarê de nekarîn gelê Wanê bi rêyên demokratîk têk bibin, bi rêya kompasên darazê, bi xefikên darazê careke din îradeya xelkê Wanê xesp dikin. Ji bo me tu hukmê vê biryarê nîne û biryareke siyasî ye. Îfadeyên leşkeran û rapora pisporan jî me mafdar derdixîne lê biryareke siyasî hate dayin. Ev biryar, li ser fermanê hate dayin. Ev biryar, hewldana xespkirina vîna milyonek û 200 hezar welatiyên Wanê ye. Li dijî vê em ê heta dawiyê demokrasî, edalet û îradeya gel biparêzin.”
MA / Adnan Bîlen